శ్రీరాముని జన్మభూమి అయోధ్యలో రామాలయం నిర్మాణం రాష్ట్రీయ స్వయం సేవక్‌ సంఘ్ సాధించిన విజయం కాదని, ఇది సమాజం సాధించిన విజయమని ఆర్ఎస్ఎస్ ప్రధాన కార్యదర్శి దత్తాత్రేయ హోసబలే స్పష్టం చేశారు.
రాష్ట్రీయ స్వయంసేవక్ సంఘ్ అఖిల భారత ప్రతినిధి సభ ఆదివారం బెంగళూరులో ముగిసింది. మూడు రోజుల పాటు జరిగిన సమావేశాల్లో ఆమోదించిన తీర్మానాలను ఆయన మీడియాకు వెల్లడించారు. దీంతో పాటు, ప్రస్తుతం దేశంలో ఉన్న అతిపెద్ద సమస్యలకు సంబంధించిన అన్ని ప్రశ్నలకు దత్తాత్రేయ సమాధానమిచ్చారు. ఇటీవల సంచలనంగా మారిన ఔరంగజేబు నుండి ముస్లిం రిజర్వేషన్, బీజేపీ అధ్యక్షుడు వరకు ఆర్ఎస్ఎస్ వైఖరిని తెలుసుకోవడానికి అడిగిన ప్రశ్నలకు దత్తాత్రేయ హోసబాలే సమాధానమిచ్చారు.
బీజేపీ పాలనలో, మంత్రులకు వ్యక్తిగత కార్యదర్శులుగా ఆర్ఎస్ఎస్ కార్యకర్తల నియామకానికి ఎప్పుడూ ఒత్తిడి చేయలేదని ఆయన స్పష్టం చేశారు. బీజేపీ అంతర్గత విషయాల్లో గానీ, ఆర్ఎస్ఎస్ ప్రేరేపిత ఇతర సంస్థల అంతర్గత విషయాల్లో గానీ ఏనాడూ సంఘ్ జోక్యం చేసుకోదన్నారు.
ఔరంగజేబు గురించి దత్తాత్రేయ హోసబాలే మాట్లాడుతూ.. భారతదేశాన్ని వ్యతిరేకించిన వారిని చిహ్నాలుగా మార్చలేమన్నారు. గంగా-జమున సంస్కృతి గురించి మాట్లాడే వ్యక్తులు ఔరంగజేబు సోదరుడు దారా షికోను ఎందుకు గుర్తుంచుకోరు? అని ప్రశ్నించారు. ఢిల్లీలోని ఔరంగజేబ్ రోడ్డును అబ్దుల్ కలాం రోడ్డుగా మార్చితే, దానికి కొంత అర్థం ఉంటుంది. మన సంస్కృతి గురించి ఎవరు మాట్లాడినా, మనం వారిని అనుసరిస్తామని ఆయన స్పష్టం చేశారు. దురాక్రమణదారుడు, దురాక్రమణ లాంటి మనస్తత్వం ఉన్న వ్యక్తులు భారతదేశానికి ముప్పు అని దత్తాత్రేయ హోసబాలే అన్నారు.
బంగ్లాదేశ్ నుండి అక్రమ చొరబాట్లు జరిగినప్పుడల్లా, దానిని ఆపడానికి చర్యలు తీసుకోవడం ప్రభుత్వ బాధ్యత అన్నారు. బంగ్లాదేశ్ నుండి అయినా లేదా మరెక్కడైనా చొరబాటు అయినా, ఇది జరగకూడదని ఎల్లప్పుడూ చెబుతూనే ఉన్నామన్నారు.
భారత రాజ్యాంగం ప్రకారం, మతపరమైన ప్రాతిపదికన రిజర్వేషన్లు ఇవ్వలేమని దత్తాత్రేయ స్పష్టం చేశారు. బాబా సాహెబ్ అంబేద్కర్ కూడా దీన్ని కోరుకోలేదన్న ఆయన, ఏదైనా ప్రభుత్వం ఇలా చేస్తే అది బాబా సాహెబ్ ఆశయాలకు వ్యతిరేకంగా పనిచేస్తోందని అర్థమన్నారు. ఒకసారి, మహారాష్ట్ర మాజీ ముఖ్యమంత్రి సుశీల్ కుమార్ షిండే కూడా మతం ఆధారంగా రిజర్వేషన్లు ప్రకటించారు. కానీ, తరువాత సుప్రీంకోర్టు దానిని అమలు చేయడానికి అనుమతించలేదని దత్తాత్రేయ హోసబాలే గుర్తు చేశారు.
