మేడ్చల్ జిల్లా మైసమ్మ గూడలోని మల్లారెడ్డి యూనివర్సిటీలో మేడ్చల్ జిల్లా రెవెన్యూ అధికారులు సర్వే చేపట్టారు. సర్వే నంబర్ 641, 642, 643, 644, 641/AA లో మొత్తం 7 ఎకరాల భూమిని కబ్జా చేసి మల్లారెడ్డి యూనివర్సిటీ నిర్మించాడన్న ఆరోపణలపై న్యాయస్థానం ఆదేశాలతో రెవెన్యూ అధికారులు సర్వే నిర్వహించారు. బహదూర్ పల్లి గ్రామానికి చెందిన పిట్ల యాదగిరి, పిట్ల సత్తెమ్మ తమ భూమిని మల్లారెడ్డి అక్రమంగా కబ్జా చేశాడని ఆరోపిస్తూ న్యాయస్థానాన్ని ఆశ్రయించారు. తమకు వంశ పారపర్యంగా వస్తున్న భూమిని.. చామకూర మల్లారెడ్డి అధికారం అడ్డు పెట్టుకొని కబ్జా చేశాడని, తమకు న్యాయం కావాలని 2014 నుండి అధికారుల చుట్టూ తిరుగుతున్నామని ఆరోపించారు. పిటిషన్‌ దారుల వాదనలు విన్న కోర్టు మల్లారెడ్డి యూనివర్సిటీలో భూములను సర్వే చేయాలని, అక్కడ స్థలం కబ్జాకు గురైందా, లేదా పరిశీలించి సర్వే రిపోర్ట్‌ అందించాలని ఈనెల 2వ తేదీన న్యాయస్థానం ఆదేశించింది.
కోర్టు ఆదేశాలతో మల్లారెడ్డి యూనివర్సిటీకి చేరుకున్న మేడ్చల్ మండల రెవెన్యూ సిబ్బంది సర్వే నిర్వహించారు. సర్వే రిపోర్టును అడ్వకేట్ కమిషనర్ అందజేస్తామని తెలిపారు. అయితే, కోర్టు ఆదేశాలతో సర్వే చేసేందుకు వచ్చిన అధికారులను మొదట కళాశాల లోనికి అనుమతించకుండా సిబ్బంది ఇబ్బందులకు గురి చేశారు. తర్వాత మల్లారెడ్డి యూనివర్సిటీ మేనేజింగ్ డైరెక్టర్ మహేందర్ రెడ్డి రెవెన్యూ అధికారులతో కలిసి వెళ్ళి సర్వే పూర్తి చేయించారు.
