- కొట్టి పారేసిన ఆప్
- కేజ్రీతో పంజాబ్ ఆప్ ఎమ్మెల్యేల భేటి
- పార్టీని ముందుకు నడిపించే అంశంపై చర్చ
- ఫిరాయింపులు అభూతకల్పనలేనన్న ఆప్
- హామీలన్నీ అమలు చేస్తామని భరోసా…
- తన పదవికి ఢొకా లేదన్న భగవంత్ మాన్
పంజాబ్ కు ఆప్ కొత్త సీఎంని నియమిస్తుందా? ప్రస్తుతమున్న భగవంత్ మాన్ ను తప్పించే అవకాశాలున్నాయా? నిజా నిజాలేమిటో తెలీదు కానీ… బీజేపి, కాంగ్రెస్ పార్టీల ఊహల తో ఈ వార్తలకు ప్రాధాన్యత ఏర్పడింది. పంజాబ్ ఆప్ ఎమ్మెల్యేలను ఆప్ అధినేత అరవింద్ కేజ్రీవాల్ మీట్ అవడం ఈ ఊహాగానాలకు తెర తీసింది. నిప్పు లేనిదే పొగరాదని, పంజాబ్ సీఎం పగ్గాలు కేజ్రీవాల్ తీసుకోవాలనుకుంటున్నారని కాంగ్రెస్, బీజేపి ప్రచారం మొదలు పెట్టాయి. కాంగ్రెస్ మరో అడుగు ముందుకేసి ఢిల్లీలో ఆప్ ను నట్టేట ముంచేసిన కేజ్రీవాల్ ఇప్పుడు పంజాబ్ పై పడ్డారని భగవంత్ మాన్ ను తప్పించి ఆ అఅధికారం తాను తీసుకుంటారని వ్యాఖ్యానించాయి. ఆప్ ఎమ్మెల్యేలందరితోనూ అందుకే కేజ్రీవాల్ భేటీ అయ్యారని బీజేపి థియరీ తీసింది.
ఫిరాయింపులంటూ వార్తలు…
అసలే కీచులాడుకుంటున్న కాంగ్రెస్ కు ఆప్ భేటీలు మరింత కలిసొచ్చాయి. కాంగ్రెస్ ఎమ్మెల్యే ప్రతాప్ సింగ్ బాజ్వా అయితే ఏకంగా 20 మంది ఆప్ ఎమ్మెల్యేలు తనతో టచ్ లో ఉన్నారని ప్రకటించాడు. ఇంకేముంది ఆప్ చీలబోతోందన్న రూమర్లూ పుట్టేశాయి. ఈ వార్తలపై పంజాబ్ సీఎం భగవంత్ మాన్ ను కదిపితే ఆయన పెద్ద నవ్వు నవ్వారు. బాజ్వా ఈ వ్యాఖ్యలను మూడేళ్ల నుంచి చేస్తున్నారు. పోయి ఢిల్లీలో కాంగ్రెస్ ఎంతమంది ఎమ్మెల్యేలను గెలిచిందో ముందు లెక్కేసుకోమని కౌంటర్ వేశారు. మీరు ఆప్ ను వదిలి వెళుతున్నారా అని భగవంత్ మాన్ ను అడిగినప్పుడు నేనెక్కడికీ వెళ్లాల్సిన అవసరం లేదు. మా కష్టంతోనే ఆప్ నిర్మాణం సాధ్యపడింది. అలా పార్టీలు మారే కల్చర్ వాళ్లదే… వాళ్ల సీనియర్ నేత ఒకరు ఢిల్లీలో డప్పులు మోగించి మరీ సంబర పడుతున్నారు… కాంగ్రెస్ జీరో సీట్లు సాధించినందుకా ఆ సంబరాలు? అని భగవంత్‌మాన్ అడిగారు. మొత్తం 117 స్థానాలున్న పంజాబ్ అసెంబ్లీలో ఆప్‌కు 93 సీట్లు కాంగ్రెస్ కు 16 సీట్లు ఉన్నాయి.
భేటీ అందుకేనా?
పంజాబ్ ఆప్ ఎమ్మెల్యేలతో అరవింద్ కేజ్రీవాల్ భేటీ ఢిల్లీ ఎన్నికల్లో వారు కష్టపడినందుకు కృతజ్ఞతలు చెప్పడానికేనని మాన్ అన్నారు. ఢిల్లీ ఓటమి పార్టీకి నిరాశను కలిగించేదే ఇప్పుడిక పంజాబ్ పై దృష్టి పెట్టబోతున్నాం. పంజాబ్‌ను మోడల్‌ స్టేట్ గా తీర్చి దిద్దుతాం అని మాన్ అన్నారు. మహిళలకు వెయ్యి రూపాయల నగదు త్వరలోనే అందిస్తామని అన్నారు. పంజాబ్‌లో పార్టీని ముందుకు తీసుకుపోవాల్సిందిగా కేజ్రీవాల్ సమావేశంలో ఎమ్మెల్యేలకు పిలుపునిచ్చారని లూథియానా సెంట్రల్ ఎమ్మెల్యే తెలిపారు. ఆప్ నుంచి కాంగ్రెస్ కి ఫిరాయింపులు ఉండబోతున్నాయన్న కథనాలపై… వారికున్న 17 మంది తమ పార్టీలోకి వచ్చేస్తారేమో… ముందు జాగ్రత్త పడమనండి అంటూ కౌంటర్ వేశారు.
