స్థానిక సంస్థల ఎన్నికలు వాయిదా వేయండి – ఈసీకి సర్పంచుల సంఘం వినతి

తాజా మాజీ సర్పంచ్‌ల సంఘం నేతలు రాష్ట్ర ఎన్నికల సంఘం అధికారులను కలిశారు. తెలంగాణ రాష్ట్రంలో ప్రభుత్వం ఏర్పాటై 14 నెలలు గడిచినా.. ఇన్నాళ్లు కాలయాపన చేసిన ప్రభుత్వం.. ఇప్పుడు ఎన్నికల నిర్వహణకు ఏర్పాట్లు చేయడంపై సర్పంచ్‌ల సంఘం నేతలు అభ్యంతరం వ్యక్తం చేశారు. ఇప్పుడు క్లిష్టమైన పరీక్షల సమయమని, ఈ సమయంలో ఎన్నికలు నిర్వహించడం సరికాదని సర్పంచ్‌ల సంఘం రాష్ట్ర అధ్యక్షుడు గూడూరు లక్ష్మి నారాయణ రెడ్డి అన్నారు. సర్పంచుల సంఘం ప్రధాన కార్యదర్శి ప్రణీల్ చందర్, తాజా మాజీ సర్పంచులతో కలిసి హైదరాబాద్‌లో తెలంగాణ రాష్ట్ర ఎన్నికల సంఘానికి పలు అంశాలపై విజ్ఞప్తి చేశారు. ఈ మేరకు ఎన్నికల సంఘం సంయుక్త కార్యదర్శి జయసింహ రెడ్డికి వినతి పత్రం అందజేశారు. విద్యార్థుల భవిష్యత్తుకు తొలి మెట్లైన పదవ తరగత, అలాగే, ఇంటర్ పరీక్షల సమయంలో స్థానిక సంస్థల ఎన్నికలు నిర్వహించవద్దని కోరారు. గ్రామీణ ప్రాంతాలలో ఎన్నికల నిర్వహణతో విద్యార్థులు విద్యాభ్యాసంపై ఏకాగ్రత కోల్పోతారని, తీవ్ర ఒత్తిడికి లోనయ్యే అవకాశం ఉన్నందున పరీక్షలు ముగిసిన తర్వాతనే స్థానిక సంస్థలకు ఎన్నికలు నిర్వహించాలని అభ్యర్థించారు. అదేవిధంగా గడిచిన ఐదు సంవత్సరాలలో గ్రామపంచాయతీలలో అనేక అభివృద్ధి కార్యక్రమాలు చేసి, వాటి తాలూకు బిల్లులు అందక సర్పంచులు ఆర్థికంగా కుదేలైపోయారని అన్నారు. వెంటనే సర్పంచుల పెండింగ్ బిల్లులు చెల్లించి, ఎన్నికలు నిర్వహించాలని ఈసీని కోరుతూ వినతి పత్రం అందించారు.