తెలంగాణ సీఎం రేవంత్‌రెడ్డి.. ఒకవైపు ప్రతిపక్షాలను ఎదర్కొంటూ.. ఇంకోవైపు అభివృద్ధి, సంక్షేమంపై దృష్టి పెట్టారు. ఏడాది పాలనలో పెద్దగా పొరపాట్లు ఏమీ లేకపోయినా.. సడెన్‌గా కేంద్ర మంత్రిని టార్గెట్ చేయడం తెలంగాణలో హాట్‌ టాపిక్‌ అయింది. ఈ విమర్శలు ప్రధానంగా తెలంగాణకు సంబంధించిన ప్రాజెక్టులు, నిధులు, మరియు కేంద్ర–రాష్ట్ర సంబంధాల చుట్టూ తిరుగుతున్నాయి. రేవంత్ రెడ్డి తన వ్యాఖ్యల్లో కిషన్ రెడ్డిని తెలంగాణ అభివృద్ధికి అడ్డంకిగా చిత్రీకరిస్తూ, రాజకీయంగా బీజేపీని రక్షణాత్మకంగా నిలబెట్టే ప్రయత్నం చేశారు. రేవంత్ రెడ్డి తరచూ కిషన్ రెడ్డిని హైదరాబాద్‌ మెట్రో ఫేజ్‌–2, రీజనల్‌ రింగ్‌ రోడ్‌ మూసీ రివర్‌ పునరుజ్జీవన ప్రాజెక్టు వంటి కీలక ప్రాజెక్టులకు కేంద్రం నుంచి నిధులు, అనుమతులు రాకుండా అడ్డుకుంటున్నారని ఆరోపిస్తున్నారు.
2025 ఫిబ్రవరి 24న ఒక సభలో, ‘నా మీద కోపంతో హైదరాబాదు, తెలంగాణ అభివృద్ధి చేయకుండా కిషన్ రెడ్డి అడ్డుకుంటున్నాడు. బీజేపీ ఎంపీలు నాతో చెప్పారు నిధులు, పథకాలు తెలంగాణకు ఇవ్వొద్దని కిషన్ రెడ్డి అడ్డుపడుతున్నాడని’ అని రేవంత్ వ్యాఖ్యానించారు. ఈ ఆరోపణల ద్వారా కిషన్ రెడ్డిని దురుద్దేశంతో పనిచేస్తున్నట్లు చిత్రీకరించారు. రేవంత్ రెడ్డి మరో ముఖ్యమైన విమర్శ ఏమిటంటే, కిషన్ రెడ్డి బీఆర్ఎస్ అధినేత కేసీఆర్‌తో రహస్య ఒప్పందం కలిగి ఉన్నారని ఆరోపించడం. ఫిబ్రవరి 28, 2025న ఒక పత్రికా సమావేశంలో, ‘కిషన్ రెడ్డి తెలంగాణ ప్రాజెక్టులను కేసీఆర్‌(KCR)ను సంతోషపెట్టడానికి అడ్డుకుంటున్నారు. ఆరు సంవత్సరాలు కేంద్ర మంత్రిగా ఒక్క ప్రాజెక్టు కూడా కేబినెట్‌లో తేలేలా చేయలేదు’ అని విమర్శించారు. ఈ వ్యాఖ్యల ద్వారా కిషన్ రెడ్డితోపాటు బీజేపీపై ప్రజల్లో అనుమానాలు సృష్టించే ప్రయత్నం చేశారు.
మూసీ రివర్‌ పునరుజ్జీవన ప్రాజెక్టు విషయంలో కిషన్ రెడ్డి ద్వంద్వ వైఖరిని రేవంత్ రెడ్డి తీవ్రంగా విమర్శించారు. ‘సబర్మతి, గంగా నదుల పునరుద్ధరణకు బీజేపీ నిధులు ఇస్తుంది, కానీ మూసీ ప్రాజెక్టుకు వస్తే కిషన్ రెడ్డి విషం చిమ్ముతున్నారు. ఇది రెండు మనసుల వైఖరి కాదా?’ అని ప్రశ్నించారు. ఈ విమర్శ ద్వారా కిషన్ రెడ్డిని తెలంగాణ ప్రయోజనాలకు వ్యతిరేకంగా నిలబెట్టే ప్రయత్నం చేశారు. రేవంత్ రెడ్డి కిషన్ రెడ్డిని కేంద్ర మంత్రిగా విఫలమైనట్లు పదేపదే ఆరోపించారు. ఫిబ్రవరి 28, 2025న ఆయన రాసిన లేఖలో, ‘తెలంగాణ కోసం రూ.1.63 లక్షల కోట్ల ప్రాజెక్టులకు నిధులు తెచ్చే బాధ్యత కిషన్ రెడ్డిది. కానీ ఆయన తన వైఫల్యాలను కప్పిపుచ్చుకోవడానికి విమర్శలు చేస్తున్నారు’ అని పేర్కొన్నారు. గతంలో జైపాల్‌ రెడ్డి, వెంకటస్వామి వంటి నాయకులు కేంద్ర మంత్రులుగా తెలంగాణకు ఎంతో చేశారని, కిషన్ రెడ్డి ఏం చేశారని ప్రశ్నించారు.రేవంత్ రెడ్డి ఈ విమర్శల ద్వారా కిషన్ రెడ్డిని టార్గెట్ చేయడం వెనుక రాజకీయ లక్ష్యం కనిపిస్తుంది.
బీజేపీని తెలంగాణలో బలహీనపరచడం, కాంగ్రెస్ ప్రభుత్వ విజయాలను హైలైట్‌ చేయడం, మరియు ప్రతిపక్షాలైన BRS, బీజేపీల మధ్య సంబంధం ఉన్నట్లు నరేటివ్‌ సష్టించడం దీని ఉద్దేశంగా కనిపిస్తోంది. ఉదాహరణకు, ‘కిషన్ రెడ్డి ఇదేనా నీ నీతి? నిధులు తీసుకరాని దద్దమ్మ… నీకు ఓట్లు అడిగే అర్హత ఎక్కడిది?’ అని రేవంత్ వ్యాఖ్యానించడం ద్వారా కిషన్ రెడ్డిని ప్రజల ముందు బాధ్యతారహితంగా చిత్రీకరించారు.ఈ విమర్శలకు కిషన్ రెడ్డి కూడా తీవ్రంగా స్పందిస్తూ, రేవంత్ ఆరోపణలను తిరస్కరించారు. ఫిబ్రవరి 28, 2025న ఆయన మాట్లాడుతూ, ‘రేవంత్ రెడ్డి ప్రభుత్వ వైఫల్యాల నుంచి దృష్టి మళ్లించడానికి నన్ను లక్ష్యంగా చేసుకుంటున్నారు. కేంద్రం పాలసీల ప్రకారం పనిచేస్తుంది, రేవంత్ బెదిరింపు రాజకీయాలు చేస్తున్నారు’ అని ఎదురుదాడి చేశారు. RRR ప్రాజెక్టుకు ఇప్పటికే అనుమతులు మంజూరైనట్లు, రాష్ట్రం సహకరించడం లేదని కూడా ఆరోపించారు.
రేవంత్ రెడ్డి కిషన్ రెడ్డిని టార్గెట్ చేయడం రాజకీయ వ్యూహంలో భాగంగా కనిపిస్తుంది. తాజాగా భువనగిరి ఎంపి చామల కిరణ్ కుమార్ రెడ్డి ఓ లేఖ విడుదల చేశారు. దుబాయ్ లో కేదరి మరణంపై సిబిఐతో విచారణ జరిపించాలని కేంద్రమంత్రి కిషన్ రెడ్డిని డిమాండ్ చేశారు. ఈ విమర్శలు తెలంగాణ ప్రయోజనాల చుట్టూ కేంద్రీకతమై ఉన్నప్పటికీ, వ్యక్తిగత దాడులు, రాజకీయ ఆరోపణలతో కూడి ఉన్నాయి. వ్యూహాత్మకంగా బీఆర్ఎస్ ను పోటీ నుంచి తప్పించేందుకే సీఎం రేవంత్ రెడ్డి బీజెపిని టార్గెట్ చేస్తున్నారని రాజకీయ వర్గాల్లో చర్చ జరుగుతోంది. ప్రభుత్వంపై వ్యతిరేకత బీఆర్ఎస్ మేలు చేయకుండా బీజెపికి దక్కాలని తద్వారా రాబోయే ఎన్నికల్లో తెలంగాణలో బిజెపిని ఎదర్కోవడం సులువని కాంగ్రెస్ నేతలు అంచనావేస్తున్నారు.
