పాలమూరు జిల్లాను అన్నపూర్ణగా తీర్చిదిద్దుతాం – డిప్యూటీ సీఎం భట్టి విక్రమార్క

– మూడు సంవత్సరాల్లో పాలమూరు రంగారెడ్డి పూర్తి చేస్తాం
– పాలమూరు జిల్లాలో కట్టిన ప్రాజెక్టులన్నీ కాంగ్రెస్ పాలన కాలం నాటివే
– రూ.2లక్షల లోపు రుణమాఫీ కచ్చితంగా చేస్తాం
– రాష్ట్రంలో పెద్ద ఎత్తున సంక్షేమ పథకాలు అమలు
– మంత్రులంతా 18 గంటలు పనిచేస్తున్నారు
– పదేళ్లు అధికారం ఇస్తే బీఆర్‌ఎస్‌ వాళ్లు అధోగతిపాలుచేశారు
– కాంగ్రెస్ నాయకులు ధైర్యంగా గ్రామాల్లో ప్రచారం చేయండి
– కరోనా సమయంలో సీఎల్పీ నేతగా వచ్చా
– ఇప్పుడు డిప్యూటీ సీఎంగా వచ్చా
– ఎప్పుడైనా ప్రజల సంక్షేమమే నా లక్ష్యం
– వనపర్తి పర్యటనలో ఉప ముఖ్యమంత్రి భట్టి విక్రమార్క

రాబోయే మూడు సంవత్సరాల్లో పాలమూరు రంగారెడ్డి ఎత్తిపోతల పథకాన్ని పూర్తి చేస్తామని, వలసల జిల్లాలో సాగునీరుపారించి అన్నపూర్ణగా తీర్చిదిద్దుతామని డిప్యూటీ సీఎం భట్టి విక్రమార్క మల్లు అన్నారు. గురువారం ఆయన వనపర్తి, నాగర్ కర్నూలు జిల్లాలో పలు అభివృద్ధి కార్యక్రమాలను ప్రారంభించిన అనంతరం వనపర్తి జిల్లా కేంద్రంలో ఏర్పాటు చేసిన కాంగ్రెస్ కార్యకర్తల సమావేశంలో ప్రసంగించారు. కృష్ణా నదిపై కోయిల్ సాగర్, బీమా, కల్వకుర్తి, నెట్టెంపాడు వంటి ప్రాజెక్టులు ప్రారంభించి పూర్తి చేసింది కాంగ్రెస్ ప్రభుత్వాలే అని అన్నారు. పాలమూరు రంగారెడ్డి ఎత్తిపోతల పథకానికి సైతం జీవో ఇచ్చింది కాంగ్రెస్ ప్రభుత్వమే అని తెలిపారు. కృష్ణా నదిపై ఎలిమినేటి మాధవరెడ్డి, శ్రీశైలం సొరంగం, డిండి వంటి ప్రాజెక్టులు ప్రాధాన్య క్రమంలో పూర్తి చేస్తాం అన్నారు. సాగునీటి ప్రాజెక్టులు పూర్తి చేయాలనే లక్ష్యంతో సీఎం రేవంత్ రెడ్డి, డిప్యూటీ సీఎం హోదాలో తాను, సాగునీటి శాఖ మంత్రి ఉత్తమ కుమార్ రెడ్డి, ఎక్సైజ్ మంత్రి జూపల్లి లు కలిసి కృష్ణా నదిపై ఉన్న ప్రాజెక్టుల ప్రగతి పై సమీక్షించామని తెలిపారు.

మీ అందరి కృషి వల్ల ప్రజా ప్రభుత్వం ఏర్పడిందని, ఎన్నికల ముందు ఇచ్చిన హామీలు పెద్ద ఎత్తున అమలు చేస్తున్నామని డిప్యూటీ సీఎం తెలిపారు. క్యాబినెట్ లోని మంత్రులందరూ 18 గంటల పాటు ప్రజల కోసం పనిచేస్తున్నారు.. పెద్ద ఎత్తున సంక్షేమ పథకాలు అమలవుతున్నాయి వీటిని ప్రజల్లోకి తీసుకువెళ్లాలన్న ఆలోచన పార్టీ శ్రేణులు చేయాలని పిలుపునిచ్చారు. నీళ్లు, ఉద్యోగాలు, ఆత్మగౌరవం కోసం కొట్లాడి తెలంగాణ రాష్ట్రాన్ని తెచ్చుకున్నాం.. మిగులు బడ్జెట్ తో రాష్ట్రాన్ని అప్పగిస్తే 10 సంవత్సరాల పాటు పాలించిన టిఆర్ఎస్ నేతలు రాష్ట్రాన్ని అప్పుల పాలు చేశారని విమర్శించారు. వారు చేసిన అప్పులు, వడ్డీలకు ఈ సంవత్సరం తాము 66 వేల కోట్లు చెల్లించామన్నారు. రాష్ట్రం ఏర్పడిన నాడు సంవత్సరానికి 6,400 కోట్లు అప్పులకు చెల్లించాల్సి వస్తే ఇప్పుడు ఏడాదికి 66 వేల కోట్లు చెల్లిస్తున్నామని తెలిపారు.

ఇందిరమ్మ ప్రజా ప్రభుత్వం అధికారంలోకి రాగానే మొదటి ఏడాది రైతు భరోసా కింద రూ.7600 కోట్లు రైతుల ఖాతాల్లో జమ చేసామని తెలిపారు. రెండు లక్షల వరకు రుణమాఫీ కింద రైతుల ఖాతాల్లో మూడు నెలల కాలంలోనే 22 వేల కోట్లు జమ చేశామని తెలిపారు. ధనిక రాష్ట్రాన్ని కేసీఆర్ చేతిలో పెడితే రెండు లక్షల రుణమాఫీని నాలుగు వాయిదాలలో చేశారని, వాళ్లు చేసిన మాఫీ వడ్డీకే సరిపోలేదని, అసలు అలాగే మిగిలి ఉందన్నారు. వారు 10 సంవత్సరాల్లో చేయలేని పనిని ఇందిరమ్మ ప్రభుత్వం మూడు నెలల్లోనే పూర్తి చేసిందన్నారు. రెండు లక్షల వరకు రైతు రుణమాఫీ జమకాని వారి సమాచారం ఇస్తే మాఫీ చేయిస్తామని కాంగ్రెస్ కార్యకర్తలు గ్రామాల్లో ధైర్యంగా ప్రచారం చేయాలని పిలుపునిచ్చారు.

రైతు రుణమాఫీ ఎక్కడ జరిగిందంటూ కేటీఆర్, హరీష్ అబద్ధాలు మాట్లాడుతున్నారని అన్నారు. రైతు భరోసా ఐదు ఎకరాలకు ఇవ్వాలని, 10 ఎకరాలకు ఇవ్వాలని అభిప్రాయం వెల్లడించారు. ఈ విషయాన్ని శాసనసభలో చర్చకు పెట్టి. సాగు యోగ్యమైన భూములన్నిటికీ రైతు భరోసా ఇవ్వాలని క్యాబినెట్ నిర్ణయించిందని తెలిపారు. రైతు భరోసాను పదివేల నుంచి ఇందిరమ్మ ప్రభుత్వం 12 వేలకు పెంచిందన్నారు. బాబా సాహెబ్ అంబేద్కర్ రచించిన రాజ్యాంగం అమలులోకి వచ్చిన జనవరి 26 నుంచి రైతుల ఖాతాల్లో రైతు భరోసా రూ.8400 కోట్లు నగదు జమ చేస్తాం అన్నారు. ఎవరు ఆలోచన చేయని విధంగా భూమి లేని వ్యవసాయ కూలీలకు ఇందిరమ్మ ఆత్మీయ భరోసా పథకం కింద జనవరి 26 నుంచి 12 వేల నగదు వారి ఖాతాల్లో జమ చేయబోతున్నామని తెలిపారు.

కాంగ్రెస్ వస్తే కరెంటు ఉండదు అన్న కేసీఆర్ 10 సంవత్సరాల పాలనలో కరెంటు ఉత్పత్తి పరిశ్రమను ఒక్కదానిని పూర్తి చేయలేదు అన్నారు. తాము అధికారంలోకి వచ్చాక రెప్పపాటు కూడా కరెంటు పోకుండా నాణ్యమైన విద్యుత్తును సరఫరా చేస్తున్నామని తెలిపారు. కరెంటు కోతలు అంటూ సోషల్ మీడియాలో బీఆర్ఎస్ నేతలు విస్తృత ప్రచారం చేసినప్పటికీ మేము రాష్ట్ర ప్రజలపై నమ్మకంతో ఉన్నాం అని తెలిపారు. రైతులకు ఉచిత విద్యుత్తు కింద రాష్ట్ర ప్రభుత్వం ప్రతి సంవత్సరం 12 వేల కోట్లు విద్యుత్ సంస్థలకు చెల్లిస్తుంది అన్నారు. పంట నష్టపరిహారం, రైతు బీమా కింద రైతుల పక్షాన ఇన్సూరెన్స్ ప్రీమియంను ప్రభుత్వమే చెల్లిస్తుందని తెలిపారు. రైతులు బోర్లు, వ్యక్తుల కింద సాగు చేసుకునేందుకు ఇబ్బంది లేకుండా భద్రాద్రి, యాదాద్రి థర్మల్ పవర్ ప్లాంట్లలో విద్యుత్ ఉత్పత్తి ప్రారంభిస్తున్నామని తెలిపారు. కేవలం ధర్మల్ విద్యుత్ కాకుండా 20,000 మెగావాట్ల గ్రీన్ పవర్ ఉత్పత్తికి ప్రణాళికలు సిద్ధం చేశామన్నారు. మిగులు కరెంటును ఇతర రాష్ట్రాలకు పంపేలా తెలంగాణ ప్రభుత్వం పని చేస్తుంది అని అన్నారు.

రాజీవ్ ఆరోగ్య శ్రీ పథకం పరిమితిని ఐదు లక్షల నుంచి పది లక్షలకు పెంచాం, 500 కే గ్యాస్ సిలిండర్, మొదటి దశలో నాలుగున్నర లక్షల మందికి ఇందిరమ్మ ఇల్లు, రేషన్ కార్డులు లేని వారందరికీ కొత్త రేషన్ కార్డులు ఇవ్వాలని క్యాబినెట్ నిర్ణయించిందని తెలిపారు. బీఆర్ఎస్ నేతలు ప్రజలకు ఇచ్చిన మాట తప్పారు అవినీతి కార్యక్రమాల్లో మునిగి తేలారు. రాష్ట్రాన్ని అప్పుల పాలు చేశారు అని అన్నారు. ప్రజల కోసం నిలబడేది కేవలం కాంగ్రెస్ ప్రభుత్వం మాత్రమే.. రాష్ట్రాన్ని ప్రపంచ పటంలో నిలిపేందుకు స్కేల్ యూనివర్సిటీ స్పోర్ట్స్ యూనివర్సిటీ రీజినల్ రింగ్ రోడ్డు మూసి పునర్జీవనం వంటి భారీ ప్రాజెక్టులు చేపడుతున్నట్లు తెలిపారు.

తొందరగా అధికారం చేపడదాం, అధికారంలోకి వచ్చి రాష్ట్ర ప్రజలను దోచుకుందామనే ఆలోచన తప్ప టిఆర్ఎస్ నేతలకు రాష్ట్ర ప్రజల ప్రయోజనాలు పట్టవు అని అన్నారు. కరోనా సమయంలో సీఎల్పీ నేతగా రాష్ట్రంలోని అన్ని ప్రభుత్వ ఆసుపత్రుల్లో పర్యటించాను, డిప్యూటీ సీఎం గా వనపర్తి కి వచ్చాను ఎప్పుడు తిరిగినా తాను ప్రజల సంక్షేమం కోసం మాత్రమే పర్యటిస్తానని తెలిపారు.