సికింద్రాబాద్‌ కళారంగ్ కాలనీలో ఐసిస్‌ స్లీపర్‌ సెల్‌ భయం

సికింద్రాబాద్‌ బోయగూడలోని కళారంగ్‌ కాలనీలో స్థానికంగా భయాందోళనలు అలుముకున్నాయి. కళారంగ్‌ కాలనీలో నివసించే సయ్యద్‌ సమీర్‌ను విజయనగరం పోలీసులు అరెస్ట్‌ చేయడంతో ఒక్కసారిగా అతను నివసించే ఇంటి పరిసర ప్రాంతాల్లో ప్రకంపనలు మొదలయ్యాయి. సయ్యద్‌ సమీర్‌.. తన తల్లి సబెరా, చెల్లెలు అలియాతో కలిసి కొంత కాలంగా కళారంగ్ కాలనీలో నివసిస్తున్నాడు. సయ్యద్ సమీర్ కాలనీ వాసులతో ఎప్పుడూ గొడవ పెట్టుకునే వాడని కళారంగ్‌ కాలనీ బస్తివాసులు చెబుతున్నారు. అంతేకాదు.. తరచూ ఓల్డ్‌ సిటీ నుంచి ఎవరెవరో వచ్చేవాళ్లని, రాత్రి వేళల్లో వాళ్లతో ఇంట్లో రహస్యంగా మాట్లాడుకునే వాడని అంటున్నారు. ఇన్నాళ్లుగా ఓ ఐసిస్‌ స్లీపర్‌ సెల్‌గా పనిచేస్తున్న వ్యక్తి తమ మధ్య తిరిగాడంటేనే భయం పుడుతోందంటున్నారు. వెంటనే సమీర్‌ కుటుంబాన్ని ఇక్కడి నుంచి ఖాళీ చేయించాలని బస్తీ వాసులు పోలీసులను కోరుతున్నారు. ఇక్కడే ఉంటూ సికింద్రాబాద్‌ రైల్వేస్టేషన్‌లో బాంబు పెట్టేందుకు ప్రయత్నించాడని పోలీసులు చెప్పడం తమను ఎంతగానో బాధ పెడుతోందని అంటున్నారు.