బందీల విడుదల ఆలస్యం చేస్తాం.. ఎందుకంటే ఇజ్రాయెల్ కాల్పుల విరమణ ఒప్పందానికి తూట్లు పొడుస్తుంది. ఇది హమాస్ చేసిన ప్రకటన. అయితే దీనికి ఇజ్రాయెల్ ఎలాంటి సమాధానం ఇవ్వలేదు. ఎందుకంటే ఇంతలోనే అమెరికా అధ్యక్షుడు డొనాల్డ్ ట్రంప్ ఎంట్రీ ఇచ్చారు. శనివారం నాటికి హమాస్ ఇజ్రాయెల్ బంధీలను రిలీజ్ చేయాల్సిందే. లేదంటే హమాస్ ఎప్పుడూ చూడని దాడులను చూడాల్సి వస్తుంది అంటూ అల్టిమేట్ వార్నింగ్ ఇచ్చారు ట్రంప్.
హమాస్ బంధీలను విడుదల చేయడం ఆలస్యం చేస్తామనడం దారుణమైన చర్య.. కానీ శనివారం మధ్యాహ్నం 12 గంటల వరకు బందీలను విడుదల చేయాల్సిందే.. లేదంటే వారు చాలా దారుణమైన పరిస్థితులు ఎదుర్కోవాల్సి వస్తుంది.. పరిస్థితులు ఉద్రిక్తంగా మారుతాయి.. ఇజ్రాయెల్ ప్రధాని బెంజిమన్ నెతన్యాహుతో మాట్లాడుతా.. కాల్పుల విరమణ ఒప్పందం రద్దు చేసుకోవాలని పిలుపునిస్తా.. ఇది హమాస్‌కు ట్రంప్ ఇచ్చిన అల్టిమేట్ వార్నింగ్.
హమాస్ చేతిలో బందీలు ఉన్నారు కాబట్టే ఇజ్రాయెల్ ఇన్నాళ్లు కాస్త ఆచితూచి అడుగులు వేసింది. లేదంటే గాజా పరిస్థితి మరింత దారుణంగా ఉండేది. ఇప్పుడా బాధ్యతను ట్రంప్ భుజానికి ఎత్తుకున్నట్టు కనిపిస్తోంది. అమెరికా సంగతి అటుంచండి.. ఇజ్రాయెల్‌పై ఈగ వాలినా ఊరుకునేది లేదని చెప్తున్నారు. ఓ వైపు గాజా నుంచి ఇజ్రాయెల్ దళాలు వెనక్కి వచ్చే సమయంలో గాజాను స్వాధీనం చేసుకుంటామన్నారు. అవసరమైతే అమెరికా దళాలు అక్కడ దిగుతాయన్నారు. గాజాను పునర్మిస్తామంటూనే అక్కడికి పాలస్తీనియులు రావొద్దని చెబుతున్నారు. ఈ వరుస పరిణామాలు చూస్తుంటే మిడిల్ ఈస్ట్‌లో ఇప్పుడప్పుడే పరిస్థితులు చక్కబడే అవకాశాలు ఏమాత్రం కనిపించడం లేదు.
