వాళ్లంతా 36 సంవత్సరాల క్రితం ఒకే కాలేజీలో చదువుకున్న క్లాస్‌మేట్స్‌. ఇప్పుడు అందరూ ఎక్కడెక్కడో ఉన్నతమైన స్థానాల్లో ఉన్నారు. మరికొందరు వ్యాపారాల్లో స్థిరపడ్డారు. ఇంకొందరు స్టార్టప్స్‌తో దూసుకెళ్తున్నారు. అయితే, వాళ్లంతా ఇప్పుడు కలుసుకున్నారు. తమ గురువులను కూడా ఆహ్వానించారు. వాళ్లను గౌరవించుకుంటూనే.. తమ ఆత్మీయతను ఆ క్లాస్‌మేట్స్‌ చాటుకున్నారు.
కడప జిల్లాలోని ప్రొద్దుటూరులో ఉన్న రాయలసీమ కాలేజ్ ఆఫ్ ఫిజికల్ ఎడ్యుకేషన్ కాలేజీలో 1987 -88 సంవత్సరంలో వాళ్లంతా వ్యాయామ విద్యను అభ్యసించారు. ఉమ్మడి ఆంధ్రప్రదేశ్‌లోని నలుమూలల నుంచి విద్యార్థులు ఆ కాలేజీలో చేరి చదువుకున్నారు. రాయలసీమ కాలేజ్ ఆఫ్ ఫిజికల్ ఎడ్యుకేషన్ కాలేజీని డాక్టర్ ఎం.వి. రమణారెడ్డి స్థాపించారు. ఆ కాలేజీలో చదివిన క్లాస్‌మేట్స్‌ అందరూ కలిసి 36 సంవత్సరాల తర్వాత హైదరాబాద్‌ శివారులోని ఆరా క్రేసిట్ రిసార్ట్స్‌లో ఆత్మీయ సమ్మేళనం పేరిట కలుసుకున్నారు. ఈ కార్యక్రమానికి అప్పుడు ఈ విద్యార్థులుగా ఉన్నవాళ్లకు పాఠాలు బోధించిన గురువులు కూడా విచ్చేశారు. గురువులందరినీ అప్పటి విద్యార్థులు, ఇప్పటి ప్రముఖులు ఘనంగా సన్మానించారు. మరోసారి వాళ్ల ఆశీస్సులు అందుకున్నారు. తమ ఆత్మీయ సమ్మేళనానికి వచ్చిన గురువులందరికీ.. 1987-88 బ్యాచ్‌ విద్యార్ధుల తరపున ధన్యవాదాలు తెలియజేశారు.
ఈ ఆత్మీయ సమ్మేళనం ప్లాన్‌ చేసి, విజయవంతంగా నిర్వహించిన ఆర్గనైజింగ్‌ కమిటీలో ప్రభుత్వ ఫిజికల్ ఎడ్యుకేషన్ కాలేజీ ప్రిన్సిపల్‌ కె.రాంరెడ్డి కీకల పాత్ర పోషించారు. ఆయనతో పాటు.. ఆర్‌. జనార్ధనరెడ్డి, వి.ఎ.భాస్కరరావు, బీ.వి.స్.నరసింహారావు. జీకెఎన్‌వి రమణమూర్తి, ఎ.రవీంద్రారెడ్డి, బీ.సురేంద్ర రెడ్డి, సీహెచ్‌ అరుణారెడ్డి ఆర్గనైజింగ్‌ కమిటీలో సభ్యులుగా వ్యవహరించారు. వీరికి టి.వెంకటరావు, ఐ.శ్రీనివాసరావు, టి.శ్రీనివాసరెడ్డి, కె.శ్రీనివాసరెడ్డి. ఎన్‌. అప్పారావు. ఎ.మల్లికార్జున తదితరులు సహకారం అందించారు. ఈ సమ్మేళనాన్ని నిర్వహించేందుకు సహకరించిన వీరందరికీ ఆర్‌సీపీఈ మిత్రబృందం ప్రత్యేక ధన్యవాదాలు తెలిపారు.
